समाज

चौकुने १०

चौकुने ९

घाटगाउँमा यस बर्ष देउसी नखेलिने, भुवा जात्रा स्थगित 

घाटगाउँ खबर

३ कार्तिक, सुर्खेत । घाटगाउँमा यस बर्ष देउसी भैलो खेल्न नपाइने भएको छ । कोरोना भाइरसको महामारीका कारण यस बर्ष देउसी भैलो खेल्न नपाईने हो । चौकुने गाउँपालिकाको ९ र १० नम्बर वडाको संयुक्त बैठकले यस बर्ष देउसी भैलो खेल्न नदिने निर्णय गरेसँगै भुवा जात्रा पनि स्थगित भएको छ ।

चौकुने ९ का वडाध्यक्ष नवराज आचार्य र १० का वडाध्यक्ष शंकर विश्वकर्माको संयुक्त अध्यक्षतामा बसेको सर्वदलीय तथा सर्वपक्षीय बैठकले यस बर्ष विगतजस्तो दशैँ तिहारमा जमघट, मेला पर्व, देउसी भैलो तथा रमाईलो गनृ बन्देज लगाएको हो ।

यस्तै चाँडपर्वमा जाँडरक्सी खान र जमघट गर्न पनि मनाही गरिएको छ । साथै जाँडरक्सी उत्पादन तथा वितरण गरेमा २५ सय रुपैयाँसम्म जरिवाना गर्ने निर्णय पनि घाटगाउँका दुवै वडाका सर्वदलीय बैठकले गरेका छन् । 

कोरोना भाइरसको महामारी बढेका कारण शहर तथा भारतबाट आएकालाई घरमै बस्न र बाहिर ननिस्कन आग्रह गरिएको छ । चौकुनेमा पछिल्लो समय कोरोना संक्रमण फैलिएपनि नयाँ परीक्षण नभएका कारण संक्रमितको संख्या शुन्य रहेको गाउँपालिकाले दाबी गर्ने गरेको छ ।

बैठकमा वडाध्यक्षद्धय आचार्य र विश्वकर्मा (कामी)सँगै नेकपा तथा कांग्रेसका स्थानीय नेताहरुका साथै वडा सचिवको पनि उपस्थिती थियो । 

 


प्रकाशित मिति: सोमबार, कात्तिक ३, २०७७, ०८:३४:००
प्रतिक्रिया दिनुहोस्